26
сентябрь
2022
Ұлтжандылық қасиет – ұрпақтан-ұрпаққа қан арқылы беріледі
Ұлтжандылық қасиет – ұрпақтан-ұрпаққа қан арқылы беріледі, өмірге келгеннен бастап қалыптасып, бойымызға сіңеді. Әрі қарай, анасының сүтімен, әкенің ықыласынан бастау алып, көрген-білген, оқыған-үйренгендеріміз арқылы патриоттық сезім қалыптасып, баланы тұлға дәрежесіне жетелейді. Ал өскелең ұрпақтың бойында жоғары азаматтық белсенділікті, патриотизмді дамыту, жеке тұлғаны және Отан алдындағы жауапкершілік сезімін қалыптастыру, салауатты өмір салтын насихаттау және жастар арасында дене шынықтыру мен әскери-қолданбалы спорт түрлерін танымал ету жолында ұстаздардың алар орны ерекше.
№28 жалпы орта білім беретін мектебінің «Жас сарбаз» сынып тәрбиеленушілері «Бәйтерек» жастар ұйымы» қоғамдық бірлестігінің төрағасы Р.Қонысбеков, «Білім басқармасының әдістемелік орталығы» ММ әдіскері Б.Нұсқабаев, Қазақстан Республикасы Қарулы Күштерінің ардагері полковник С.Онбаевпен кездесті.
Кездесу барысында қонақтар патриотизм, батылдық, адалдық туралы кеңінен айтып, Отанға қызмет ету үшін қажырлы еңбек ету, патриот болу, кәсіби шеберлікті арттырып, жаңа дағдыларды игеру қажет екендігін түсіндірді. Жас патриоттар заманауи қазақстандық армия, әскери қызмет және әскери қызметші мамандығы туралы мол мағлұмат алды. Қарулы Күштердің құрылу тарихы мен бүгінгі жағдайынан хабардар болды. Оқушылардың барлығы әңгімеге белсенді қатысып, өздерін қызықтырған сұрақтарын қойды. Кездесу жиынының соңында 40 дана ақпарат кітапша, 200 дана буклет таратылды.
