#әріптескеқұрмет

Шымкент қаласындағы №28 жалпы орта білім беретін мектеп ұжымы Рабиға Еркінбекова сынды тәжірибелі ұстаздармен мақтанады. 

Тараздағы (бұрынғы – Жамбылдағы) Абай атындағы педагогикалық училище мен Алматыдағы Мемлекеттік қыздар педагогикалық институтын бастауыш сынып мұғалімі мамандығы бойынша тәмамдаған Рабиға Ауданбекқызы 41 жылдан бері жас буынды білім нәрімен сусындатып, бүгінде өзі 1979 жылы алғаш рет әріп танытқан оқушылардың немерелерін оқытып келеді. Миллионды мегаполисте өзіне ең алғаш мектеп қабырғасында әріп танытқан апайын іздеп тауып, ұл-қызы мен немересін алдына әкеп, сіздің сыныбыңызда оқыса, деп ата-ананың өтініш айтуы ұлағатты ұстаз үшін биік мәртебе. 

– Мұғалім ретіндегі мақсатым – алдымен тал бесікте негізі қаланған ұлттық тәрбие негізінде жас буынды қайта тәрбиелеу, содан кейін білім беру, - дейтін ұстаздың оқушылары еліміздің әр бұрышында табысты еңбек етіп жүр. Бұрынғы оқушыларының алды елімізге белгілі дәрігер, ұстаз, мемлекеттік қызметкер, спортшы енді бірі кәсіпкер болса, кейінгілері мектеп қабырғасында тәрбиеленіп, білім алып жүр. Бұл бүкіл саналы ғұмырын ұрпақ оқытуға  арнап, он буын шәкірт тәрбиелеп шығарған ардақты ұстаз үшін асқақ абырой. 

Шәкіріттері аудандық, қалалық, облыстық, республикалық, халықаралық білім сайыстарында топ жарған Рабиға Ауданбекқызының лайықты еңбектері еленіп, түрлі грамоталармен, дипломдармен және «Шығармашыл тәжірибелі ұстаз», «Қазақстан Республикасының Тәуелсіздігіне 25 жыл» сынды медальдармен марапатталған. 

Көптеген байқаулар мен сайыстардың көш басынан көрінетін Рабиға апайымыздың биыл Қазақстан Республикасының Тұңғыш Президенті, Елбасы Нұрсұлтан Назарбаевтың Алғыс хатын алуы  бізді ерекше қуантты. Лайым, алдағы уақытта ұрпақ тәрбиелеу жолындағы мол тәжірибеңіз бен терең біліміңізді жас ұстаздармен бөлісіп, оларды баулуға жұмсайды, деп сенеміз. Өзіңізбен, біздің Рабиға апай, деп мақтанамыз! 

Талай жылғы педагогикалық еңбектің өтеуі – құрметті зейнетке шығар алдын, Сізге мықты денсаулық, отбасыңызға бақ-береке, амандық және көп-көп қуаныштар тілейміз! 

Қанша жыл бір шаңырақ астында қатар еңбек еткен әріптестерді ұмытпай жиi-жиі мектепке келіп тұрады деген ойдамыз.

Ізгі ниетпен, Шымкент қаласы №28 жалпы орта білім беретін мектеп ұжымы