13
сентябрь
2022
«Отан отбасынан басталады»
Жеке адамды басқа адамдармен қарым-қатынасқа, мәдениеттілікке тәрбиелеуде отбасы – алғашқы қадам. Сондықтан, отбасы – өте қажетті баспалдақ, сыйластық пен жарастық орнаған орта. «Отан отбасынан басталады» демекші, шағын ғана отбасынан басталған татулық, сыйластық, ауызбіршілік елдің, мемлекеттің нығаюына алып келетіні сөзсіз.
Ата-ана мен бала арасындағы байланысты нығайтып, отбасы құндылықтарын берік ету және мектеп оқушыларын ұйымшылдыққа, патриоттыққа тәрбиелеу мақсатында №28 жалпы орта білім беретін мектебінде «Толағай» отбасылық сайысы өткізілді. Аталған іс-шараны «Отбасы күніне» орай, дене шынықтыру әдістеме бірлестігінің ұстаздары ұйымдастырды.
Жарыс барысында отбасы мүшелері біріге отырып, түрлі кедергілерден бірлесе өтіп, бір-біріне деген ықыластары артты. Ұл-қыздарымен бір топта болып, қолдау көрсеткен ата-аналар, балаларының мерейін өсіріп, өмірге, білімге деген құштарлығын арттырды.
Ептілік пен күштілік додаға түскен сайыста барлық топ жеңіске жету жолында намысқа тырысып, өздерінің мықтылығын дәлелдеу үшін барын салды. Жеңімпаз отбасылар мақтау қағаздарымен марапатталды.
