19
октябрь
2022
Алтынсариннің 100 жылдығына орай
Қазақтардың материалдық мәдени мұрасының маңызды құрамдас бөлігі халық қолөнері болып табылады. Онда ата-бабаларымыздың тәжірибесі мен ақыл-ойы, халық шығармашылығының өзіндік ерекшелігі мен қайталанбастығы шоғырланған. Ал шеберлеріміз ұрпақтың тәрбиесіне ден қойып, көркем де сұлу өнерлерімен оларға ой салып, әсемдікке, сұлулыққа үйреткен.
Бүгінгі таңда өнер асылының өз саласында құнды екендігін дәлелдеп, ғасырлар бойы дамып, қалыптасып келе жатқан халық шығармашылығының сарқылмас қайнар көзiн, мәдениетiміздiң айнасын өзіне тән дағдылар мен білімге негіздеп келе жатқан мектебіміздің көркем еңбек пәнінің мұғалімі, Қазақстан шеберлер одағының мүшесі, Қазақстан дизайнерлер одағының мүшесі Шермуханбетова Эльмира Анарбековна оқушыларға ұлттық құндылықтарды сіңіріп, жас ұрпақтың бойындағы эстетикалық-көркемдік талғамын дамытып, еңбекқорлыққа баулып, өткеннің игілігіне ұқыпты қарауды үйретіп келеді.
Қазіргі заманғы идеяларды ежелгі өнермен үйлесімде іске асыруға ұмтылып, тарихи-этно фильмдердегі көркем бейнелерді сомдаған, әрбір образдарды ерекше өрнектермен көркемдеген кесте шебері бойындағы өнерін оқушыларға махаббатпен үйретіп, шығу тарихы ғасырлар қойнауының тым тереңінен басталатын қолөнердің өсу жолы мен даму тарихын түсіндіріп, мәдени қажеттіліктерін байытып, әсемдікті қабылдау сезімдерін қалыптастырып келеді. Мектебімізде ұстаздық қызмет атқарып келе жатқан азғана уақыттың ішінде Эльмира Анарбекқызының шәкірті, №28 жалпы орта білім беретін мектебінің 7-сынып оқушысы Асқарова Нұрай Ұлы ағартушы Ыбырай Алтынсариннің 100 жылдығына орай Шымкент қаласы мектептерінің арасында өткізілген «Ы.Алтынсарин балалар иллюстрациясында» атты графикалық арт-галерея байқауына қатысып, ІІІ дәрежелі дипломмен марапатталды.
Өзінің шәкірттерінен биік талғамды, таудай талантты, шыдамдылықты талап ететін ардақты, асыл мұраны дәріптеуші ұстазымыз, халық өнерінің қас шебері Эльмира Анарбекқызына шығармашылық табыс тілейміз. Ғажайып дүниенің сырын ұқтыру жолындағы еңбегіңіз арта берсін, өрнектеріңіз құнын жоғалтпасын! "Ұстаз бақыты - озып туған шәкірті" демекші, атыңызды әлемге паш ететін, талантты да, білімді шәкірттеріңіз көбейе берсін!